Chipi ilusiónase co crecemento do FSF Castro Cando

A falta de tres xornadas para poñerlle o ramo á tempada 2024-2025, o adestrador do FSF Castro Cando, José Carlos Martín ‘Chipi’, xa pensa no futuro e faino con ambición. Hai motivos. A eliminación nas semifinais da Copa da Raíña fronte ao Melilla, na quenda de penaltis, deixou ese sabor agridoce de ter rozado a final. Pero lonxe de emborronar a tempada, reforza a idea dun crecemento sostido e sólido do club, tanto dentro como fóra da pista. Sobre o parqué, competindo de igual a igual contra calquera rival. Nas bancadas, coa afección enchendo de forza cada partido e soñando con fitos que hai só uns anos parecían imposibles.

Chipi mira cara adiante pero sen perder de vista o inmediato: as tres últimas xornadas da Liga Iberdrola feminina contra Melilla, Poio Pescamar e Les Corts. O obxectivo é manter a sexta praza, un broche de ouro para unha campaña ilusionante. “Foi unha moi boa tempada, demostramos que podemos competir contra todos. Agora toca pechar ben o ano, sen riscos, e mirar xa cara a seguinte etapa”, comenta o técnico.

A tempada 2024-2025 serviu como punto de inflexión. O grupo medrou, gañou experiencia e demostrou madurez nos escenarios máis esixentes. “O equipo foi forte mentalmente, agora toca renovar o bloque e pechar os reforzos que temos enriba da mesa para o vindeiro curso”, sinala.

Sobre a Copa da Raíña, Chipi teno claro: “Marchamos con orgullo. Tivémolo preto. Demos un paso adiante a nivel táctico, emocional e como club. Non se nos deu esta vez, pero achegámonos máis ao que queremos ser. Coa ambición e a seriedade que estamos amosando, acabaremos tocando metal”.

Da derrota en penaltis fronte ao Melilla tamén saca aprendizaxes. “Fomos valentes. Buscamos a vitoria ata o final. Hai detalles por mellorar, pero tamén hai que recoñecer que fixeron un partido perfecto”. A experiencia das tandas é, segundo Chipi, un factor traballable: “En 27 anos só perdín dúas, esta e a da Copa Galicia. Se teño que esperar outros 27 para repetir iso, firmo agora mesmo. Pero aprendemos e xa competimos mellor ca naquela. Seguiremos crecendo”.

Actualidade do clube

Un paso da final, pero máis preto ca nunca

O FS Castro Cando roldou a épica en Cartagena. Non foi suficiente para alcanzar a final da Copa da Raíña, pero o equipo deu un golpe enriba da mesa e deixou unha mensaxe clara: este proxecto vai en serio e está preparado para todo. O Melilla Torreblanca, un dos equipos máis potentes da liga, só puido eliminar ás nosas nos penaltis tras un empate a dous nun partido intenso e cheo de alternativas que demostrou a personalidade dun equipo valente, competitivo e sen complexos.

Desde o asubío inicial, o plan de Chipi incomodou a un rival que partía como favorito, pero que tivo que resistir ao empuxe dun Castro ambicioso e decidido. As ocasións caeron do noso lado e o gol de Ana Luiza no minuto cinco non mudou o rumbo dun primeiro tempo que dominamos con claridade. A resposta chegou pronto, Dani Sousa transformou o penalti que lle fixeron a ela mesma e o equipo seguiu insistindo, cunha portera rival inspiradísima que evitou o segundo en múltiples ocasións.

Na segunda metade o duelo igualouse pero o Castro mantivo o carácter. Laura Boix rompeu pola esquerda e Antía marcou cun disparo preciso no minuto 33. Puidemos sentenciar cun disparo de campo a campo de Julia que bateu no pau, e cando xa rosmabamos a final, un último golpe de fortuna permitiu a Caroline empatar a un minuto do final.

Na tanda de penaltis, o azar non estivo do noso lado. Melilla foi máis certero e clasificouse por un axustado 4-3. Chipi foi claro tras o partido. Non só puxemos contra as cordas ao mellor equipo da liga, senón que volvemos demostrar que o FS Castro está feito para competir entre os grandes. Quedamos ás portas, pero camiñamos con paso firme e coa convicción de que o mellor aínda está por chegar.

Actualidade do clube

O FSF Castro Cando fai historia e xa está nas semifinais da Copa da Raiña

O FS Castro Cando continúa a escribir unha páxina inesquecible na historia do deporte lucense. O noso primeiro equipo feminino logrou o pase ás semifinais da Copa da Raíña, tras unha vitoria sólida e sen fisuras ante o Teldeportivo (0-4) na cidade de Cartagena, escenario dun soño que cada vez está máis preto de facerse realidade.

O equipo chairego impuxo desde o inicio o seu xogo, personalidade e intensidade, demostrando por que é un dos grandes nomes desta edición. A superioridade do conxunto dirixido por Chipy quedou patente desde os primeiros compases, con dominio da posesión, orde táctica e un traballo colectivo impecable.

 Foi Jenny Santos, cun disparo seco e colocado, quen abriu o marcador no minuto 7, poñendo en marcha a máquina competitiva do Castro. Antes do descanso, Laura Boix ampliou vantaxe tras culminar unha contra perfecta, asinando un 0-2 que xa marcaba o camiño.

Na segunda parte, o equipo non perdeu a identidade: seguridade defensiva, cabeza fría e corazón quente. Ante o xogo de cinco das canarias, o Castro mantivo a calma e respondeu con intelixencia. Foi entón cando Julia Melz, desde porta a porta, asinou un golazo de campo enteiro para sentenciar. E poucos segundos despois, Camila Costa, tras un roubo con sangue fría, anotou o definitivo 0-4.

Cada paso que damos nesta Copa da Raíña é un reflexo do traballo da nosa base, da nosa afección e da nosa maneira de entender o deporte. Somos un club pequeno en tamaño, pero xigante en ambición e valores.

Coa atención dos medios nacionais e os focos da TVE postos enriba, o FS Castro xa espera rival para as semifinais, coa ilusión intacta e a humildade de quen sabe que todo é posible cando se cre en equipo.

Actualidade do clube