O Fútbol Sala Castro é un exemplo vivo do poder do deporte para transformar realidades, crear comunidade e inspirar ás novas xeracións. Fundado no ano 2014 por iniciativa de Carmen Tojo, quen continúa á fronte como presidenta, o club naceu coa ilusión de ofrecer unha alternativa deportiva en Castro de Riberas de Lea, no concello de Castro de Rei, un pequeno núcleo rural da provincia de Lugo.

O que comezou como un equipo modesto en liga provincial foi medrando coa forza do traballo colectivo e a paixón polo fútbol sala. O club non tardou en ascender categorías e consolidarse como unha entidade de referencia no deporte feminino galego, culminando coa histórica chegada do primeiro equipo feminino á Primeira División Nacional, a máxima categoría estatal, na tempada 2023-2024.

Na actualidade, o FS Castro conta con 13 equipos en competición, agrupando máis de 130 xogadores e xogadoras de diferentes idades e niveis, repartidos en equipos femininos, masculinos e mixtos. Esta estrutura permite traballar desde a base con obxectivos deportivos, pero tamén formativos e sociais, fomentando valores como a igualdade, o compañeirismo, o respecto e a disciplina.

O club aposta decididamente pola integración da muller no deporte, ofrecendo as mesmas oportunidades a nenos e nenas, e creando un espazo seguro onde todas e todos poidan medrar, tanto dentro como fóra da pista, ao mesmo tempo, a conexión co territorio e o orgullo de representar á Terra Chá e á provincia de Lugo están presentes en cada adestramento, en cada partido e en cada logro colectivo.

O FS Castro é hoxe un proxecto serio, sólido e con proxección nacional, pero sen esquecer nunca as súas raíces nin os seus valores fundacionais.

Un club feito con humildade, traballo e corazón, que representa á súa xente con dignidade, talento e unha identidade única.

Porque en Castro, o fútbol sala é máis ca deporte: é unha forma de vivir e soñar en equipo.